ក្នុង​ពិធីបុណ្យ​កាន់បិណ្ឌ​ ​និងបុណ្យ​ភ្ជុំបិណ្ឌ​ នេះប្រជាពលរដ្ឋ​ មានការ​រៀបចំ​ចម្អិន​អាហារ​ជាច្រើន​មុខ​សម្រាប់​ទៅវត្តផង និងបរិភោគ​ជូប​ជុំគ្រួសារ​។ តើប្រ​ជាពល​រដ្ឋ​យើង​គួរ​ធ្វើបែបណាខ្លះ​ដើម្បី​ធ្វើ និង​រក្សា​ម្ហូប​ឲ្យមាន​អនាម័យ និង​សុវត្ថិភាព?​

ទន្ទឹម​គ្នានោះ​ផងដែរ​ ​ការទុក​ដាក់អាហារ​ ​ជារឿង​ចាំបាច់​ដែល​លោកអ្នក​​មិនរំលង​ ព្រោះ​ថាការ​ធ្វេសប្រហែស​​ការចម្អិតអាហារខ្វះអនាម័យ​ ​ និងទុកដាក់​ចំណីអាហារ​មិនបាន​ត្រឹមត្រូវ​ ​អាចបណ្តាល​ឲ្យពុល​ ដែល​ភាគ​ច្រើន​មាន ​រោគសញ្ញា​ដូចជា៖ ​ក្អួត ចង្អោរ ​រាគ រាគមួល​ជាដើម​ ហើយអាច​បណ្តាល​ឲ្យមាន​គ្រោះថ្នាក់​ដល់​ជីវិត​ ។

ដើម្បី​ចៀសវាង​គ្រោះថ្នាក់​ខាងលើ​ ​និង​ការខាតបង់​ពេលវេលា​និង​ថវិកា​ នាយកដ្ឋានប្រយុទ្ធនឹងជំងឺឆ្លង បានប្រាប់ពីវិធានការ​ដ៏សមញ្ញចែកជូនប្រិយមិត្ត​ឲ្យដឹង​ពីរបៀប​រក្សាអាហារ​ឲ្យ​មាន​អនាម័យ​ ​តាមវិធី​ខាង​ក្រោម​៖

• ១. ​ប្រើប្រាស់​ទឹកស្អាត​ ​និង​ម្ហូបអាហារ​ដែលស្អាត​ជានិច្ច

• ២. ត្រូវ​លាងដៃ​នឹងសាប៊ូ​ ​មុនពេល​និងអំឡុង​ពេលរៀបចំម្ហូបអាហារ ​មុននិង​ក្រោយ​ពេលបន្ទោរ​បង់​

• ៣. ​លាងបន្លែ​ ផ្លែឈើ​ឲ្យបាន​ស្អាតមុន​បរិភោគ​

• ៤. ​សំអាត​សម្ភារៈ​ប្រើសំរាប់​ចម្អិត​ម្ហូប​អាហារ​ឲ្យបាន​ត្រឹម​ត្រូវ​

• ៥. ​ចម្អិន​អាហារ​ឲ្យបាន​ឆ្អិនល្អ​ ​ជាពិសេស​សាច់​ ​សត្វស្លាប​ ​ស៊ុត​ ​និង​អាហារ​សមុទ្រ

• ៦. ​ទុកដាក់​អាហារ​ឆៅ​និងឆ្អិន​ដាច់ដោយ​ឡែក​ពីគ្នា

• ៧. ​មិនត្រូវ​រក្សាទុក​អាហារជា​ច្រើន​ថ្ងៃទេ​ ​ទោះជា​ស្ថិត​ក្នុងកម្រិត​សីតុណ្ហភាព​សុវត្ថិភាព​ក៏ដោយ​

​បើយើង​រក្សាអាហារ​ទុកក្នុង​ប្រព័ន្ធត្រជាក់​ ​គឺត្រូវ​ឲ្យនៅ​ក្រោម​តុណ្ហភាព​ ​៥អង្សាសេ​

​បើយើង​រក្សាអាហារ​ទុកក្នុង​ប្រព័ន្ធកម្ដៅ​ គឺ​ត្រូវឲ្យ​លើស​ពីសីតុណ្ហភាព​ ​៦០អង្សាសេ

• ៨. ​កុំប្រើប្រាស់​ចំណីអាហារ​ហួស​កាលកំណត់​ប្រើប្រាស់​៕