នាម៉ោង​ប្រមាណ ៩ព្រឹក ថ្ងៃទី២១​ ខែធ្នូ​ ឆ្នាំ២០២០​ នេះ មានអគ្គិភ័យមួយកើតឡើងនៅស្ថិតនៅ ផ្លូវ ៣៦៧ កែង៦៣១ ក្រុមទី ១៥ ភូមិព្រែក សង្កាត់ ច្បារអំពៅទី០១​ ខណ្ឌច្បារអំពៅ រាជធានីភ្នំពេញ​ ដែលមានមា្ចស់ទីតាំងឈ្មោះ ឡាំង អ៊ាបខេង ជនជាតិខែ្មរ​ ភេទស្រីអាយុ៤៩ឆ្នាំ​ មុខរបរមេផ្ទះ​។ បើតាមការបញ្ជាក់នៅលើទំព័រហ្វេសប៊ុកស្នងការដ្ឋាន​នគរបាលរាជធានីភ្នំពេញ អគ្គិភ័យ​នេះ គឺបណ្ដាល​មក​ពី​ការ​ឆ្លង​ចរន្ត​អគ្គិសនី។

ផ្ទះ​ដែល​ទទួល​រង​អគ្គិភ័យនេះ គឺជា​ប្រភេទសំណង់ឈើប្រក់សង្ក័សី ទំហំ ៥ម៉ែត្រ x ១៦ម៉ែត្រ​។ ផ្ទះ និងសម្ភារៈប្រើប្រាស់​ប្រចាំថ្ងៃ បានខូចខាតទាំងស្រុង ព្រមទាំង​បាន​ឆេះរាលដាលដល់ផ្ទះអ្នកជិតខាងអស់០១ចំហៀងផ្ទះផងដែរ។ អគ្គិភ័យនេះ មិនបណ្តាលឲ្យមានមនុស្សរបួស​ ឬស្លាប់ឡេីយ​ ។

អគ្គិភ័យបានរលត់ទាំងស្រុង នាម៉ោង​ ១០:១៥នាទីព្រឹក ដោយ​ប្រើ​រថយន្ត​ពន្លត់អគ្គិភ័យជាច្រើនគ្រឿង ដែលមានដូចជា៖

• រថយន្តការិយាល័យអគ្គិភ័យ​ ចំនួន០៨គ្រឿង ប្រេីប្រាស់ទឹកអស់ចំនួន​ ១៦ឡាន​ស្មេីនឹង ៦៤ ម៉ែត្រគូប

• រថយន្តជំនួយ​របស់ក្រសួងមហាផៃ្ទ:ចំនួន០២គ្រឿង ប្រើប្រាស់ទឹកអស់០២ឡានសើ្មនឹង ១២ ម៉ែត្រគូប

• រថយន្តអាវុធហត្ថ:ចំនួន០៣គ្រឿង ប្រើប្រាស់ទឹកអស់ចំនួន ០៣ឡានសើ្មនឹង ១២ម៉ែត្រគូប

• រថយន្តទីក្រុងកោះពេជ្រ: ចំនួន០៤គ្រឿង ប្រើប្រាស់ទឹកអស់ចំនួន ០៤ឡានសើ្មនឹង ២៤ ម៉ែត្រគូប

• រថយន្តបុរីប៉េងហ៊ួត:ចំនួន០២គ្រឿង ប្រើប្រាស់ទឹកអស់ចំនួន ០២ឡានសើ្មនឹង ១២ ម៉ែត្រគូប

• រថយន្តជ្រោយចងា្វរ:ចំនួន០១គ្រឿង ប្រើប្រាស់ទឹកអស់ចំនួន ០១ឡានសើ្មនឹង ០៦ម៉ែត្រគូប៕

រូបភាព៖ ស្នងការដ្ឋាននគរបាលរាជធានីភ្នំពេញ