គ្រួសារខ្មែរ-បារាំង លើកទាំងគ្រួសារទៅមើលថែអភិរក្សដំរីប្រើចំណាយផ្ទាល់ខ្លួនសុទ្ធ ឥឡូវជួបការលំបាក

2022-02-14 02:00:40
ព័ត៌មាន

2022-02-14 02:00:40
ចំនួនមតិ 0 | ចំនួនចែករំលែក 0

ចន្លោះមិនឃើញ

គ្រួសារជនជាតិខ្មែរ-បារាំងមួយ ដែលមានសមាជិក ៥នាក់(ប្ដីប្រពន្ធ និងកូន៣នាក់) បានសុខចិត្តបោះបង់ចោលជីវិតហ៊ឺហារនៅទីក្រុង ហើយទៅរស់នៅខេត្តរតនៈគីរី មើលថែ និងអភិរក្សសត្វដំរីស្រុក ដោយប្រើថវិកាផ្ទាល់ខ្លួនសុទ្ធសាធ ឥឡូវជួបការលំបាកដោយសារការចំណាយខ្ពស់ខ្លាំងពេក។

គ្រួសារអ្នកស្រី ចិន្តា ក្លែស(CHENDA CLAIS) ប្រធានសមាគមអភិរក្សដំរីខ្មែរអៃរាវត្តា និងស្វាមី ដើមឡើយគឺជាអ្នករស់នៅរាជធានីភ្នំពេញ និងជាបុគ្គលិកជាន់ខ្ពស់ក្រុមហ៊ុនធានារ៉ាប់រងរបស់បារាំងមួយ។ ប៉ុន្តែក្រោយមកបានសម្រេចចិត្តបោះបង់ជីវភាពនៅទីក្រុងមករស់នៅយ៉ាងសាមញ្ញមនៅក្នុងខេត្តរតនៈគីរី នៅឆ្នាំ ១៩៩៩ ដោយកាលនោះ អ្នកស្រីមានសមាជិកតែ២នាក់ជាមួយស្វាមី។

ពេលមកដល់ អ្នកស្រីបានដឹងថា ខេត្តនេះ មានសក្ដានុពលផ្នែកទេសចរណ៍ធម្មជាតិ និងបានដឹងថា ខេត្តនេះមានសត្វដំរីជាច្រើនក្បាលដែលចិញ្ចឹមដោយបងប្អូនជនជាតិ។តាមអ្នកស្រី ចិន្តា កាលនោះខេត្តរតនៈគីរី បានដំរីស្រុកប្រមាណជា ៧០ក្បាល។ ប៉ុន្តែក្រោយមកបានថយចុះដោយសារ ដំរីចាស់ និងឈឺស្លាប់ មូលហេតុផ្សេងទៀត គឺការលក់ដំរីទៅខេត្តផ្សេងៗទៀត។

មើលឃើញស្ថានភាពនេះ អ្នកស្រី និងក្រុមគ្រួសារបានសម្រេចធ្វើកិច្ចការដ៏ធំ គឺការថែរក្សា និងអភិរក្សសត្វដំរីស្រុកក្នុងខេត្តរតនៈគីរី។កិច្ចការនេះ អ្នកស្រី ចិន្តា បានទិញយកដំរីស្រុក១ក្បាលកាលពីឆ្នាំ២០១៥ ឈ្មោះអ៊ីកែវ មកចិញ្ចឹម។ បន្តមក ក៏ចេះតែទិញចូលបន្តបន្ទាប់ពីអ្នកភូមិយកមកចិញ្ចឹមដោយប្រើកញ្ចប់ថវិកាផ្ទាល់ខ្លួនសុទ្ធសាធនៅប៉ុន្មានឆ្នាំដំបូង។

ស្ត្រីសម្បុរសណ្ដែកបាយ បានប្រាប់ថា ពេលមកដល់ខេត្តរតនៈគីរីដំបូងអ្នកស្រីបានបង្កើតជាផ្ទះស្នាក់ និងក្រោយមកបានកែប្រែក្លាយជាសណ្ឋាគារ។ អ្នកស្រីបានប្រើចំណូលពីមុខរបរនេះដើម្បីចិញ្ចឹមខ្លួន និងការងារអភិរក្សដំរីនៅប៉ុន្មានឆ្នាំដំបូង។ "ចាប់ផ្ដើមអៃរាវត្តាដំបូងគឺប្រើប្រាស់ថវិការបស់ក្រុមគ្រួសារបង។ បាន 3 ឆ្នាំបន្ទាប់មកមកដល់បច្ចុប្បន្ននេះទើបបានទទួលថវិកាពីសប្បុរសជនពីសម្ដេចម៉ែពីក្រសួងបរិស្ថានដែលបានជួយគាំទ្រក្នុងគម្រោង"។

បច្ចុប្បន្នអ្នកស្រី ចិន្តា ក្លែស៍ និងស្វាមី ព្រមទាំងកូន៣នាក់ បូករួមទាំងបងប្អូនសាច់ញាតិ មិត្តភ័ក្តិជាច្រើនទៀត បានរួមគ្នាពុះពារក្នុងការងារដ៏លំបាកនេះ ដែលទាមទារការតស៊ូ និងអត់ធ្មត់ខ្ពស់ ក្នុងគោលបំណងចង់ឃើញកំណើតកូនដំរីស្រុកដំបូង ហើយទីបំផុតក៏ធ្វើបាន។ “ក្រោយការតស៊ូ អំណត់ព្យាយាមរបស់យើង ទីបំផុតដំរីអ៊ីកែវ កើតបានកូនដំបូងឈ្មោះ ណូអែល នៅថ្ងៃទី ២៦ ធ្នូ ២០២១"។

ត្បិតថាជោគជ័យលើការបង្កាត់ពូជដំរីស្រុក ប៉ុន្តែបច្ចុប្បន្នគម្រោងអភិរក្សដំរីដែលមានឈ្មោះថា ប៉ុន្តែជាកិច្ចការដែលមានខ្ទង់ចំណាយខ្ពស់បំផុតដែរ ដល់ទៅប្រមាណ ១២ម៉ឺនដុល្លារឯណោះក្នុង១ឆ្នាំ។ ខ្ទង់ចំណាយនេះ តាមអ្នកស្រី ចិន្តា មូលនិធិពីក្រុមគ្រួសារ និងពីប្រភពផ្សេងទៀតនោះ បានជួយសម្រាលបានតែប្រមាណ ៤០% ប៉ុណ្ណោះ ដែលធ្វើអ្នកស្រីកំពុងជួបការប្រឈមក្នុងការងារនេះ។

រូបភាព៖ សមាគមអភិរក្សដំរីខ្មែរអៃរាវត្តា និងហ្វេសប៊ុក Chenda Clais

ដោយសារតែបែបនេះ សមាគមអភិរក្សដំរីខ្មែរអៃរាវត្តា ទើបនឹងរៀបចំរាត្រីសមោសរមួយដើម្បីប្រមូលមូលនិធិដើម្បីបន្តបេសកកម្មនេះបន្តទៀត ដែលគេឃើញសិល្បករ និងអ្នកមុខអ្នកការជាច្រើនបានចូលរួម។ ជាមួយគ្នា ក្រសួងបរិស្ថាន ក៏បានប្រកាសដែរថា នឹងបន្តជួយគាំទ្រដល់សកម្មភាពរបស់សមាគមន៍មួយនេះបន្តទៀតដែរ ដោយសារសមាគមន៍ មានបេសកកម្មដូចគ្នានឹងក្រសួងបរិស្ថាន៕

អត្ថបទ៖ ទារិកា