នៅក្នុងពិព័រណ៍ការងារ ក្រសួងការងារ បង្ហាញប្រភេទការងារ ៤ ដែលនឹងមានតម្រូវការខ្ពស់នាពេលអនាគត

2022-10-28 01:51:36
ព័ត៌មាន

2022-10-28 01:51:36
ចំនួនមតិ 0 | ចំនួនចែករំលែក 0

ចន្លោះមិនឃើញ

ប្រទេសកម្ពុជាបាន និងកំពុងស្ថិតក្នុងសង្វាក់នៃសាកលភាវូបនីយកម្ម ដែលនាំឲ្យមានការប្រែប្រួលតម្រូវការជាច្រើននៅក្នុងសង្គមទៅតាមការអភិវឌ្ឍន៍សេដ្ឋកិច្ចសង្គម និងបច្ចេកវិទ្យា ក្នុងនោះសូម្បីតែក្នុងអាជីពការងារ មុខជំនាញខ្លះ ក៏ត្រូវបានព្យាករណ៍ពីតម្រូវការខ្ពស់នាពេលអនាគតដែរ។

ថ្លែងនៅក្នុងពិធីបើកសម្ពោធ "ពិព័រណ៌ការងារ និងផលិតភាពជាតិ ២០២២" ឯកឧត្តមបណ្ឌិត ពេជ សោភ័ន រដ្ឋមន្រ្ដីប្រតិភូអមនាយករដ្ឋមន្ដ្រី រដ្ឋលេខាធិការប្រចាំការនៃក្រសួងការងារ និងបណ្តុះ បណ្តាលវិជ្ជាជីវៈ និងជាអនុប្រធានគណៈកម្មាធិការជាតិបណ្តុះបណ្ដាល បានមានប្រសាសន៍ឲ្យដឹងថា តាមការសិក្សាសកលមួយបានបង្ហាញថា ខ្ទង់ប្រមាណ ១០ឆ្នាំទៀត អាជីព ឬជំនាញខ្លះក្នុងតួលេខ ១ភាគ៣ នឹងត្រូវបាត់បង់ តាមការវិវត្តនៃការអភិវឌ្ឍន៍សង្គម។

បរិបថក្នុងប្រទេសកម្ពុជាយើងក៏ដូចគ្នា ដែលនឹងត្រូវថមថយ និងកើននូវតម្រូវការងារលើមុខជំនាញមួយចំនួន។ ក្នុងន័យនេះ ក្នុងនាមតំណាងឲ្យក្រសួងការងារ បានបើកបង្ហាញនូវប្រភេទមុខជំនាញចំនួន ដែលត្រូវបានព្យាករណ៍ថា នឹងមានតម្រូវការខ្ពស់នាពេលអនាគតសម្រាប់បរិបថការងារនៅក្នុងស្រុក ក្នុងនោះរួមមាន៖

១.ជំនាញបច្ចេកទេស៖ ដែលជាចំណេះដឹង និងសមត្ថភាពជាក់លាក់សម្រាប់ការងារ ឬអាជីពការងារមួយ ពិសេសបច្ចេកវិទ្យាព័ត៌មានដូចជា (ការរចនា ការសរសេរកូដកម្មវិធី និងការវិភាគទិន្នន័យជាដើម។

២.ជំនាញឥរិយាបថ៖ ពាក់ព័ន្ធនឹងការសិក្សារៀនសូត្រនវានុវត្តន៍ដូចជា៖ ការច្នៃប្រឌិត ការគិតជ្រៅជ្រះ ការធ្វើការងារជាក្រុម ការចរចា ការដោះស្រាយបញ្ហា ការទំនាក់ទំនងគ្នា

៣.ជំនាញជីវិត និងអាជីព៖ ដែលជាបុគ្គលិកលក្ខណៈនៃសង្គមអារម្មណ៍៖ គំនិតផ្ដួចផ្ដើម និងការដឹកនាំផ្ទាល់ខ្លួន ភាពទន់ភ្លន់ងាយសម្របខ្លួន ការទទួលខុសត្រូវផ្ទាល់ខ្លួន គណនីយភាព និងភាពងាយបត់បែនលឿនស្រុះគ្នាជាដើម។

៤.ជំនាញអន្តរវប្បធម៌៖ ជំនាញសហការតាមប្រព័ន្ធ Software និងបណ្ដាញសង្គម ជំនាញចម្រុះព័ត៌មាន និងការប្រើបច្ចេកវិទ្យាដើម្បីសម្រាលបន្ទុកការងារជាដើម។

រាជរដ្ឋាភិបាល បាន និងកំពុងអនុវត្តគោលនយោបាយចតុកោណតំណាក់កាលទី៤របស់ខ្លួន ដោយក្នុងនោះ ការបង្កើនការងារដល់យុវជនកម្ពុជា គឺជាកិច្ចការអាទិភាពមួយដើម្បីឈានទៅបង្កើតផលិតភាពការងារ សម្រាប់រុញដោលកំណើនសេដ្ឋកិច្ចជាតិ។ ក្នុងន័យនេះ "ពិព័រណ៍ការងារ និងផលិតភាពជាតិ" ដែលមានការគាំទ្រពីផ្នែកពាក់ព័ន្ធជាច្រើន ត្រូវបានធ្វើឡើង១ឆ្នាំម្ដងអស់រយៈពេលជាច្រើនឆ្នាំមកហើយ។

សម្រាប់ឆ្នាំ ២០២២នេះ "ពិព័រណ៍ការងារ និងផលិតភាពជាតិ" បានប្រារព្ធឡើងជាថ្មីទៀតនៅទីក្រុងកោះពេជ្ររយៈ ពេល២ថ្ងៃ គឺថ្ងៃទី ២៨-២៩តុលា ក្រោមកិច្ចសហការជាមួយសហភាពសហព័ន្ធយុវជនកម្ពុជារាជធានីភ្នំពេញ និងសមាគមរោងចក្រកាត់ដេរ ដែលមាន ក្រសួង-ស្ថាប័ន ក្រុមហ៊ុន សហគ្រាស ដៃគូអភិវឌ្ឍន៍ និងអង្គការជាតិ-អន្តរជាតិ គ្រឹះស្ថានអប់រំបណ្តុះបណ្តាលចំនួន ១៥០បញ្ជរ បានចូលរួមដាក់តាំងសេវាកម្ម និងបង្ហាញតម្រូវការរបស់ខ្លួន ដែលនាំមកនូវឱកាសការងារថ្មីៗថែមទៀតចំនួនជាង ២ម៉ឺនកន្លែង នៅក្នុងវិស័យនាំមុខសំខាន់ៗដូចជា៖ ធនាគារ គ្រឹះស្ថានមីក្រូហិរញ្ញវត្ថុ និងធានារ៉ាប់រង សេវាកម្មលក់ដុំនិងរាយ ទេសចរណ៍និងបដិសណ្ឋារកិច្ច ម្ហូបអាហារ និងភេសជ្ជៈ អចលនទ្រព្យ និងសំណង់, ទូរគមនាគមន៍និងបច្ចេកវិទ្យាព័ត៌មានវិទ្យា ឧស្សាហកម្ម និងកម្មន្តសាល ព្រមទាំងវិស័យសេវាកម្មផ្សេងៗ ហើយរំពឹងថាមានអ្នកដាក់ពាក្យស្នើសុំរកការងារ និងសម្ភាសផ្ទាល់នៅនឹងកន្លែងប្រមាណ ៣ ម៉ឺននាក់។

តាមឯកឧត្តមបណ្ឌិត ពេជ សោភ័ន កម្មវិធីនេះ មានគោលបំណងសំខាន់បំផុតគឺ បង្កើតជាកន្លែងផ្គូរផ្គង ការនាំឱ្យកាន់តែខិតជិតគ្នារវាងនិយោជក ដែលមានឱកាសការងារច្រើនសន្ធឹកសន្ធាប់ និងអ្នកស្វែងរកការងារដែលមានសមត្ថភាព នៅមួយកន្លែងដោយងាយស្រួល ដើម្បីធ្វើការជ្រើសរើសកម្លាំងពលកម្មតាមតម្រូវការ, ដាក់ពាក្យសុំការងារដែលខ្លួនចូលចិត្ត ទទួលបានការប្រឹក្សាយោបល់អាជីព, ការត្រៀមខ្លួនចូលការងារយ៉ាងសកម្មផុលផុស និងការស្វែងយល់ពីការបង្កើនផលិតភាព។

ជាមួយគ្នានេះដែរ ដើម្បីជាការត្រៀមខ្លួនសម្រាប់ការផ្លាស់ប្ដូរតម្រូវការងារទៅសង្វាក់នៃសាកលភាវូបនីយកម្មនៃការអភិវឌ្ឍន៍សង្គមសេដ្ឋកិច្ច ឯកឧត្តមបណ្ឌិត បានសំណូមពរ និងអំពាវនាវដល់យុវជនដែលកម្លាំងពលកម្មក្នុងស្រុក ត្រូវអភិវឌ្ឍខ្លួន ពិសេសសិស្សនិស្សិត និងកម្មករនយោជិត ត្រូវចាប់ផ្ដើមទទួលខុសត្រូវការផ្ដួចផ្ដើមផ្ទាល់ខ្លួន ក្នុងការរៀបចំផែនការអាជីពឲ្យជាក់លាក់ ដោយការធ្វើការកំណត់គោលដៅអាជីពឲ្យច្បាស់លាស់ ដោយឈរលើក្ដីប្រាថ្នា និងអាទិភាពដែលចង់សម្រេចបាន។

ជាងនេះទៅទៀត ត្រូវស្វែងរកឱកាសការងារ ដែលស្របទៅនឹងគោលដៅដែលបានកំណត់ ហើយត្រូវនឹងចំណង់ចំណូលចិត្ត និងសមត្ថភាពខ្លួន។ ជាមួយគ្នា ក៏ធ្វើការវាយតម្លៃគម្លាតជំនាញរបស់ខ្លួនធៀបនឹងតម្រូវការជំនាញក្នុងឱកាសការងារដែលខ្លួនចង់ចាប់យកនាពេលអនាគត។ បន្ទាប់មកប្រែក្លាយគម្លាតនេះទៅជាផែនការអភិវឌ្ឍជំនាញ និងអាជីពមួយឲ្យច្បាស់លាស់ ដើម្បីឈានទៅសម្រេចគោលដៅដែលបានកំណត់។

មួយវិញទៀត ដើម្បីរក្សានូវនិរន្តរភាពនៃតម្រូវការចំពោះចំណេះជំនាញ និងសមត្ថភាពខ្លួននៅក្នុងអាជីពការងារ យុវជនយើងត្រូវធ្វើការវាយតម្លៃ និងកែតម្រូវឡើងវិញជាប្រចាំនូវផែនការអភិវឌ្ឍអាជីពនេះ ដោយសារគោលដៅអាជីព ចំណង់ចំណូលចិត្តការងារ និងមុខរបររបស់យើង តែងតែផ្លាស់ប្ដូរទៅតាមការអភិវឌ្ឍន៍សេដ្ឋកិច្ចសង្គម និងបច្ចេកវិទ្យា៕