សម្ដេចតេជោ ហ៊ុន សែន ចែកគន្លឹះ ៤យ៉ាង ដើម្បីស្ដារទេសចរណ៍ក្នុងតំបន់ អេកម៉ិក និង CLMVអាស៊ាន

2022-11-02 21:19:09
ព័ត៌មាន

2022-11-02 21:19:09
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្នុងនាមជាថ្នាក់ដឹកនាំរាជរដ្ឋាភិបាលកម្ពុជា ដែលត្រូវបានគេទទួលស្គាល់ថាជាប្រទេសមួយមានលទ្ធផលល្អលើការប្រយុទ្ធប្រឆាំង ទប់ស្កាត់ការរីករាលដាលជំងឺកូវីដ១៩ សម្ដេចតេជោ ហ៊ុន សែន បានផ្ដល់អនុសាសន៍គន្លឹះចំនួន ៥ ដល់បណ្ដាប្រទេសក្នុងតំបន់អាស៊ានក្នុងការស្ដារទេសចរណ៍ក្រោយគ្រោះកូវីដ១៩។

នៅក្នុងសារលិខិតស្វាគមន៍ និងបើកកិច្ចប្រជុំរដ្ឋមន្ត្រីទេសចរណ៍អេកម៉ិក(ACMECS)លើកទី៥ និងកិច្ចប្រជុំរដ្ឋមន្ត្រី CLMV លើកទី៦ ម្សិលមិញនៅខេត្តសៀមរាប សម្ដេចតេជោ ហ៊ុន សែន បានគូសបញ្ជាក់ថា ការមកដល់របស់កូវីដ១៩រង្វង់ជាង២ឆ្នាំមកនេះ តួនាទីនៃវិស័យទេសចរណ៍ ត្រូវបានមើលឃើញភាពកាន់តែចាំបាច់ក្នុងការទ្រទ្រង់សេដ្ឋកិច្ច និងភាពរីកចម្រើនរបស់សង្គមជាតិ។ ជាពិសេស គឺតួនាទីដ៏សំខាន់ក្នុងការពង្រឹងទំនាក់ទំនងរវាងប្រជាជាតិ និងប្រជាជាតិ សាមគ្គីភាព និងមិត្តភាពនៃប្រទេសក្នុងតំបន់។

ក្នុងន័យនេះ ដើម្បីជាមូលដ្ឋាននៃការអភិវឌ្ឍន៍វិស័យទេសចរណ៍ អេកម៉ិក និង CLMV ទាំងពេលបច្ចុប្បន្ន និងអនាគត សម្ដេចនាយករដ្ឋមន្ត្រីរបស់កម្ពុជា បានចែកនូវការគិតគូរមួយចំនួន៖

១. អេកម៉ិក និង CLMV គួរបង្កើនកិច្ចសហប្រតិបត្តិការលើការអភិវឌ្ឍន៍ផលិតផលថ្មី បំពេញឲ្យគ្នាទៅវិញទៅមក និងផ្ដល់នូវភាពសំបូរបែបដល់ទេសចរ ស្របតាមការប្រែប្រួលនិន្នការទេសចរណ៍ក្រោយវិបត្តិកូវីដ១៩។ ក្នុងន័យនេះ ប្រទេសជាសមាជិក គួរបង្កើនកិច្ចសហការលើការអភិវឌ្ឍន៍ទេសចរណ៍ជនបទ ដែលរួមមានទេសចរណ៍សហគមន៍ ទេសចរណ៍ម្ហូបអាហារ អេកូទេសចរណ៍ ទេសចរណ៍ផ្សងព្រេង កសិទេសចរណ៍ ទេសចរណ៍សុខមាលភាព ជាដើម ដែលទាំងនេះ ជាតម្រូវការទេសចរណ៍កំពុងកើនឡើង ហើយចូលរួមដោយផ្ទាល់ដល់ការរីកចម្រើននៅមូលដ្ឋាន។ ទន្ទឹមគ្នានេះ អេកម៉ិក និង CLMV គួរដាក់ចេញនូវក្របខណ្ឌកិច្ចសហប្រតិបត្តិការជួយគាំទ្រសហគ្រាសធុនតូចបំផុត តូច និងមធ្យម(MSMEs) អោយក្លាយជាឆ្អឹងខ្នងនៃការអភិវឌ្ឍន៍វិស័យទេសចរណ៍ប្រកបដោយភាពធន់ និងចីរភាព។

២.ក្នុងបរិបថឌីជីថលូបនីយកម្ម ប្រទេស អេកម៉ិក និង CLMV គួរជំរុញការផ្លាស់ប្ដូរបទពិសោធន៍លើដំណើរការបរិវត្តកម្មឌីជីថលក្នុងវិស័យទេសចរណ៍ ក្នុងនោះគួរដកពិសោធន៍ពីគ្នាទៅវិញទៅមក លើការអនុវត្តកម្មវិធីអក្ខរកម្មឌីជីថលក្នុងវិស័យទេសចរណ៍ ការអភិវឌ្ឍន៍ជំនាញឌីជីថល ក៏ដូចជាការប្រើប្រាស់បច្ចេកវិទ្យាឌីជីថល ក្នុងការបង្កើនផលិតភាព និងឧត្តមភាពប្រកួតប្រជែង។

៣. អេកម៉ិក និង CLMV គួរគិតគូរជំរុញលំហូរទេសចរណ៍ផ្ទៃក្នុងតំបន់ អេកម៉ិក(ACMESs-Intra trveler) និងលំហូរទេសចរផ្ទៃក្នុងតំបន់ CLMV (CLMV Intra Traveler): ដោយត្រូវគិតគូរផងដែរលើការបង្កើនការតភ្ជាប់ផ្លូវគោក ផ្លូវអាកាស និងផ្លូវទឹកបន្ថែមទៀត ព្រមទាំងជំរុញទេសរណ៍បើកបរដោយខ្លួនឯង (Self-Driving Tour)។

សម្ដេចលើកឡើងថា៖ "សម្រាប់ការទាក់ទាញទេសចរណ៍ពីប្រទេសទី៣ ខ្ញុំសូមគាំទ្រឲ្យបន្តផ្សព្វផ្សាយក្រោមយុទ្ធនាការ "ប្រទេស៥ គោលដៅទេសចរណ៍តែ១" និង "ប្រទេស៤ គោលដៅទេសចរណ៍តែ១។

៤.ដើម្បីសម្របសម្រួលការអនុវត្តន៍ផែនការសកម្មភាពទេសចរណ៍ អេកម៉ិក និង CLMV ដែលបានដាក់ចុះ ខ្ញុំសូមគាំទ្រនូវការគិតបង្កើតឲ្យមានយន្តការស្ថាប័នទេសចរណ៍ អេកម៉ិក និង CLMV ដែលអាចជាលេខាធិការដ្ឋាន ឬរចនាសម្ព័ន្ធណាមួយ ហើយកម្ពុជាមានសេចក្ដីរីករាយក្នុងការទទួលធ្វើជាម្ចាស់ផ្ទះ"៕